हान्ने होइन त बञ्जी जम्प ?

जाम्बिया-जाम्बेजी मैत्री पुल । यही पुलबाट तल जाम्बेजी नदिमा बञ्जी जम्प गरिन्छ । तस्वीर: सौजन्य ।

बञ्जी जम्पका बारेमा लिभिङ्स्टोनमा अनौठो चर्चा रहेछ । भिक्टोरीया फल्स आइपुग्नु अघि जाम्बेजी नदिले मुसोकोट्वाने, सेकुटी र मुकुनी चिफडम पार गर्नुपर्छ । जाम्बियामा चिफडम भनेको गाबिस भनेजस्तै हो, र चिफ भनेको त्यहांको प्रमुख कार्यकारी हो । चिफलाई रोयल हाइनेश भनेर सम्बोधन गरिन्छ राजकीय सम्मान दिइन्छ । कसैले आफ्नो अपमान गरेको महसुस भएमा त्यसलाई कारवाही गर्ने अधिकार चिफलाई प्राप्त हुन्छ ।

भिक्टोरीया फल्स नजिकै जाम्बिया र जिम्बावे जोड्ने मैत्री पुल छ । जाम्बेजी नदिमाथि बनेको यो पुल नदि भन्दा धेरै माथिको उचाईमा छ । त्यसैले यहांबाट बञ्जी जम्प हान्ने ब्यवस्था गरिएछ । यो क्षेत्रका चिफसंग बञ्जी जम्प कम्पनीका मान्छेहरुले बञ्जीबारे ब्याख्या गरेछन् । चिफलाई पनि एक पटक त हान्नु पो पर्यो के हुंदो रहेछ भनेर सुर चढेछ । उनी आफ्ना दुई बडिगार्डसंगै पुलमा आएछन् । एकदमै खातिरदारी गर्दै बञ्जी आयोजकले उनको शरीरमा बेल्ट बांधेछन् । खुट्टामा रोप कसेछन्, क्यामेराले फोटो खिचेछन् र माथिबाट ठेलिदिएछन् । चिफ उधों मुन्टो परेर खोला तिर फालिएछन् । खुट्टामा बांधिएको इलाष्टिकवाला रोपको सहायताले चार पांच पटक तलमाथि गर्दै खोला तर्फ मुन्टो फर्काएर छुत्ती खेलाईसकेपछि आयोजकले चिफलाई माथि तानेछन् ।

माथि चिफ आइपुग्दा थाहा भएछ, चिफ त जाम्बेजी नदि माथि छुत्ती खेल्दा गम्भीर समस्यामा पो परेका रहेछन् । उनी नदितिर हुत्याइएपछि, उनको पेट वाउंडिएछ र जवाफ दिएछ, फलस्वरुप उनलाई बञ्जी जम्पिङ् अवधिमै टुर्रे छुटेछ । तल सकुशल गएका चिफ त फर्किदा ठसठसी गनाउने भएर पो आइपुगेछन् । अब भने कर्मचारीले हांसो थाम्न सकेनछन्, हासौं, चिफको मानहानी गरेकोमा कारवाहीमा परिने डर, नहासौं चिफको हरिबिजोग । हांस्न खोज्दा रहेछन्, फेरी हिक्क हिक्क गर्दै हांसो रोक्दा रहेछन् । पुल माथि आइपुगेपछि बडीगार्डहरुलाई पनि कर्मचारीलाई झैं समस्या भएछ । तर पनि उनीहरु हिक्क, हिक्क गर्दै हासेछन् । आफैले गाडी चलाएर हिडेका चिफ फेरी फर्केर आएका छैनन् रे ।

भिक्टोरीया फल्स घुमिसकेपछि मैले गाइडलाई भनें, अब बञ्जी हान्न जाउं । उसले मैले बञ्जी हान्छु भनेर पत्याएन, यो कथा सुन्न पाइयो । अरुले बञ्जी जम्प हानेको देखेपछि मलाई पनि रहर त लागेको थियो, पछि फेरी चिफको कथा सम्भिएं, र मैले बञ्जी हान्ने मनसाय त्यागिदिएं । सोच्दैछु, हाने पनि बञ्जी जम्प नेपालकै द लाष्ट रिसोर्टमा गएर हानौंला । आफ्नै देशमा हान्दा त चिफको जस्तो अवस्था सृजना नहोला कि ।